"Ынтымак Ордого" экскурсияга барган жарандар кандай эрежелерди сактоо керек?

Бишкек шаарындагы "Ынтымак Ордого" экскурсия ар жуманын ишемби күнү өткөрүлөт. Бул тууралуу маалыматты бүгүн, 22-ноябрда Президенттин администрациясы таратты.

Маалыматка ылайык, аталган жайга кирүү үчүн алгач электрондук түрдө паспорт менен катталып, белгиленген бөлүмдөрдү толтуруу шарт.

Ошону менен катар имарат менен таанышууга келген жарандардын кийген кийимдери коомдук жайларда жүрүүнүн жалпы ченемдерине жооп берүүсү зарыл. Жана экскурсия учурунда коомдук тартипти сактоого тийиш.

"Ынтымак Ордого" бир жолу кирип таанышып чыккан жаранга экинчи жолу уруксат берилбейт. Санитардык-эпидемиологиялык кырдаал курчуган учурларда, мамлекеттик иш-чаралар өтүп жаткан учурларда экскурсия уюштуруу убактылуу токтотулат.

Экскурсия учурунда төмөнкүлөргө тыюу салынат:

имаратка спирт ичимдиктерин, тамак-аш, суусундуктарды, балмуздак жана башка алып кирүүгө;
имараттын ичине ок атуучу куралдарды, саюучу-кесүүчү предметтерди, бат от алуучу баллондорду, ууландыруучу, жардыруучу жана зыяндуу заттарды, чоң көлөмдөгү баштык, рюкзак, чемодан жана башка буюмдарды алып кирүүгө;
ролик, велосипед, скейтборд пайдаланууга;
коомдук жалпы жүрүм-турум эрежелерин, кооопсуздук техникасын, ошондой эле экскурсия өткөрүүчүнүн талаптарын бузууга;
коштоп жүргөн жооптуу кызматкерсиз өз алдынча кызматтык бөлмөлөргө жана башка жайларга кирүүгө;
имараттын ичиндеги приборлорду, жабдууларды, жарык берүүчү жана башка техникалык системаларды өз алдынча өчүрүп-күйгүзүүгө.

Белгилей кетсек, эрежелерди бузган жаранга административдик имараттын ички тартибин көзөмөлдөөчү кызматкерлер тарабынан эскертүү берилет.

Автор: Бурул Турусбекова