Ысык-Көлдөгү Бостери айыл өкмөтүнүн кызмат адамдарына кылмыш иши козголду

Ысык-Көл районундагы Бостери айыл өкмөтүнүн кызмат адамдарына карата кылмыш иши козголду. Бул тууралуу бүгүн, 18-декабрда облустук милициядан билдирди.

Маалыматка ылайык, "Арсенал строй" ЖЧКсынын эсебине 1 миллион 475 миң сом акча каражаттарын мыйзамсыз которушканы үчүн Кылмыш-жаза кодексинин 210-беренеси (Ишенип берилген мүлктү ыйгарып алуу же коротуу) менен кылмыш иши козголду.

"Бул аракеттер Бостери айыл өкмөтү менен "Арсенал строй" ЖЧКсы арасында 2020-жылы түзүлгөн келишимдин алкагында ишке ашырылган. Келишимдин 1.1-пунктуна ылайык, кардар (айыл өкмөтү) төлөмдөрдү болгону ишке ашырылган иштердин көлөмү боюнча гана жүргүзүүгө милдеттүү. Бирок аткарылбаган иштерге карабастан, акча каражаттары подрядчы уюмдун эсебине которулуп, мамлекетке чоң материалдык чыгымдар келтирилген", - деп айтылат маалыматта.

Тергөө амалдарынын жүрүшүндө, Бостери айыл өкмөтүнүн башчысынын мурдагы милдетин аткаруучусу Т.А. кармалып, убактылуу кармоочу жайга киргизилди. Учурда тергөө амалдары уланууда.

Автор: Бек Оморбеков
Фото: Ысык-Көл ОИИБ