Бишкекте жарандын 4 миң долларын алдап кеткен 58 жаштагы шектүү кармалды

Бишкекте алдамчылык фактысы боюнча издөөдө жүргөн шектүү кармалды. Бул тууралуу Октябрь райондук ички иштер бөлүмү билдирди.

Маалыматка ылайык, 12-декабрда милицияга Э.С. аттуу жаран арыз менен кайрылган. Ал Н. аттуу жаран 2018-жылы ишеничине кирип, "Сокулук районунун аймагынан үй курууга 2 жер тилкесин алып берем" деген шылтоосу менен 4 миң долларын алып, убадасын аткарбай изин жашырып кеткенин айткан.

Бул факты боюнча Кылмыш-жаза кодексинин 209-беренесинин (Алдамчылык) негизинде кылмыш иши козголгон. Шектүү катары 58 жаштагы жаран кармалып, убактылуу кармоочу жайга киргизилген.

Учурда анын ушул сыяктуу кылмыш фактыларын жасоого катыштыгы бар экендиги аныкталууда.

Автор: Кылымбек Бейшеев
Фото: Октябрь РИИБ