Диск, телефон, китеп... Ысык-Көлдө "Хизб ут-Тахрир" уюмунун мүчөлөрүнүн үйлөрү тинтүүгө алынды (фото)

Ысык-Көл облусунун аймагында мыйзамсыз диний-экстремисттик уюмдун идеологиясын жайылтууга байланыштуу кылмыш иши козголду. Бул тууралуу облустук милициядан кабарлады.

Маалыматка ылайык, 29-ноябрда "Хизб ут-Тахрир" диний-экстремисттик уюмунун идеологияларын жайылтып жүргөн жарандардын өздүктөрү такталган. Факты каттоого алынып, Кылмыш-жаза кодексинин 332-беренесинин (Экстремисттик материалдарды даярдоо жана таратуу) негизинде кылмыш иши козголгон.

Анын алкагында 18-декабрда соттун уруксаты менен 3 адамдын турак жайларына мыйзамдуу түрдө тинтүүлөр жүргүзүлгөн. Натыйжада жарандардын үйлөрүнөн төмөнкүдөй далил заттар табылган:

Жети-Өгүз районуна караштуу Жеңиш айылынын тургуну, мурда соттолгон жарандан 1 даана СD-диск жана өз ыктыяры менен өткөрүп берген 1 даана ПОКО үлгүсүндөгү телефон.
Жеңиш айылынын дагы бир тургунунан 2 даана тыюу салынган "Коомго кирүү" жана "Ислам түзүмү" аталышындагы диний китептер жана 1 даана А4 барагындагы кыргызча жазуулар.
Жеңиш айылынын үчүнчү тургунунан 1 даана HUAWEI үлгүсүндөгү телефон жана 2 даана Redmi үлгүсүндөгү телефон.

Алынган далил заттар соттук-лингвистикалык, теологиялык жана дин таануу экспертизаларына жөнөтүлгөн. Учурда тергөө амалдары уланууда.

Автор: Кылымбек Бейшеев
Фото: Ысык-Көл ОИИБ