Сот департаментинин кызматкерлерине Кыргызстандан чыгып жаткан унаалар берилди (сүрөттөр)

Бүгүн, 26-декабрда Жогорку Соттун алдындагы Сот департаментинин кызматкерлерине 54 кызматтык унаа берилди. Бул туурасында президенттик администрациянын маалымат кызматы билдирди.

Иш-чарага Министрлер кабинетинин төрагасы Адылбек Касымалиев катышты.

“Жаңы жылдын алдында сот аткаруучулар кызматы түзүлгөндөн бери биринчи жолу жаңы кызматтык унааларды алып жатат. Бул өлкөнүн материалдык-техникалык базасы чыңдалып жаткандыгынан кабар берет. Мамлекеттик бюджеттин эсебинен 102 миллион 898 миң сомго 54 кызматтык унаа алынды”, – деп билдирди Касымалиев.

Төрага акыркы эки жылда сот системасына бөлүнгөн бюджет дээрлик үч эсеге көбөйгөнүн кошумчалады.

Белгилей кетсек, Сот департаментине Кыргызстанда чыгарылган Шевроле Трекер унаалары алынган.

Автор: Замира Ниязбекова