Ошто баңгизат сатуу менен алектенген уюшкан кылмыштуу топтун мүчөлөрү кармалды

Ош облусунда узакка созулган атайын операциянын натыйжасында баңгизат сатуу менен алектенген уюшкан кылмыштуу топтун мүчөлөрү кармалды. Бул тууралуу Ички иштер министрлигинен билдирди.

Маалыматка ылайык, 15-октябрда Ош ШИИБине сатуу максатында баңгизаттарды мыйзамсыз даярдоо боюнча арыз катталган. Ыкчам издөө иш-чараларынын жүрүшүндө, ИИМдин ыкчам каттосунда уюшкан кылмыштуу топтун мүчөсү катары каттоодо турган Ош шаарынын тургуну, буга чейин 8 жолу соттолгон, 1991-жылы туулган М.у.Н. жетектеген ал топто 1999-жылы туулган Н.у. Н., 2000-жылы туулган З.у.Ч., 1998-жылы туулган Б.у.М. бар экендиги аныкталган.

"Кылмыштуу топ Ош облусунун аймагында баңгизат сатуу менен алектенген. 18-декабрда М.у.Н. кармалып, аны унаасын текшерүү учурунда эки бычак табылып алынган. 20-декабрда Б.у.М. кармалып, унаасын текшерүү учурунда гашиш баңгизаты табылган. Андан соң мурда аталган кылмыштуу топтун мүчөлөрү кармалып, шектүүлөрдүн баары Ош шаарынын тергөө абагына киргизилди", - деп айтылат билдирүүдө.

Учурда тергөө амалдары уланууда.

Автор: Бек Оморбеков
Фото: ИИМ