Чүйдө төрт адамдын арызынан кийин 35 жаштагы жаран кармалды

Ысык-Ата районунда уурулукка шектелген жаран кармалды. Бул тууралуу бүгүн, 13-январда Чүй облустук ички иштер башкармалыгынан билдирди.

Маалыматка ылайык, 22-декабрда милицияга 47 жаштагы жаран арыз менен кайрылган. Ал ошол түнү Красная-Речка айылында токтоп турган КамАЗ үлгүсүндөгү жүк ташуучу унаанын аккумуляторун уурдап кетишкенин айткан.

Мындан тышкары милицияга Ысык-Ата районунун дагы үч тургуну ушундай эле арыз менен кайрылышкан. Алардын да арыздары каттоого алынып, факты боюнча Кылмыш-жаза кодексинин 205-беренесинин (Уурдоо) негизинде кылмыш иштери козголгон.

Шектүү катары мурда соттолгон 1991-жылы туулган К.Н. аттуу жаран кармалып, убактылуу кармоочу жайга киргизилди.

Учурда кармалган адамдын ушул сыяктуу башка кылмыштарды жасоого тиешеси бар-жогу аныкталууда. Тергөө иштери уланууда.

Автор: Кылымбек Бейшеев
Фото: Чүй ОИИБ