Кеминдеги трассанын жээгине ийне жалбырактуу көчөттөр отургузулду (фото)

Бишкек–Нарын–Торугарт унаа жолунун боюнда айлана-чөйрөнү жашылдандыруу, көрктөндүрүү ишембилиги өттү. Бул тууралуу Өзгөчө кырдаалдар министрлиги кабарлады.

Бул ишембиликте 2000 түп тянь-шань карагайын отургузуу пландалган.

Ишембилик Өзгөчө кырдаалдар министрлигинин токой кызматы, Чүй облусундагы ыйгарым укуктуу өкүлчүлүк, Кемин райондук мамлекеттик администрациясы жана жергиликтүү бийлик органдары тарабынан уюштурулган.

Эске салсак, үстүбүздөгү жылдын 29-январында аталган иш-чаранын алкагында мурда 500 түп ийне жалбырактуу тянь-шань карагайы отургузулуп, экологиялык абалды жакшыртууга багытталган.

Өнөктөштүктүн негизги максаты — аймактагы экологиялык абалды жакшыртуу, ошондой эле жол аймактарындагы жашылдандыруу иштерин күчөтүү.

Бул жылы Кемин районунан Балыкчы шаарына чейинки унаа жолунун 50 чакырымдык бөлүгүндө бак отургузуу каралган.

Автор: Азат Бейшенбеков