УКМК Таласта сот аткаруучу, ишкер жана Салык кызматынын башчысы кармалганын билдирди

Талас облусунун Боо-Терек айылында балык чарбанын жалпы аянты 16,5 гектар жер тилкеси арзан баада мыйзамсыз сатылгандыгы аныкталды. Бул тууралуу бүгүн, 17-февралда УКМКдан билдирди.

Маалыматка ылайык, 11-февралда "Талас балык чарба" мамлекеттик ишканасына тийиштү Бакай-Ата районундагы Боо-Терек айылында жайгашкан жалпы аянты 16,5 гектар көлмө соттун чечими менен аукцион аркылуу мыйзамсыз сатылганы аныкталган.

Аукционду уюштуруу жана көлмөнү сатуу иштерине шектүү катары төмөндөгү мамлекеттик кызматкерлер аныкталып кармалышты:

1974-жылы туулган Ш.А. (Бакай-Ата райондук Сот департаментинин сот аткаруучусу);
1962-жылы туулган Ж.Б. Бакай-Ата райондук Салык кызматынын башчысы);
1969-жылы туулган Ч.М. (көлмөнү мыйзамсыз сатып алган жеке ишкер).

Жогорудагы адамдар Талас ОИИБинин убактылуу кармоочу жайына 1 айга камакка алынышты. Алар өз кызыкчылыктары үчүн аталган көлмөнү 874 миң 500 сомго арзан баалап, мыйзамсыз сатып жиберишкени кошумчаланды.

Автор: Бек Оморбеков