"Башкы план-2050". Мэрия шаарды көрктөндүрүү боюнча сунуштарды күтөт

Бишкек шаарынын мэриясы башкы план концепциясын иштеп чыгуу боюнча иштердин болжолдуу наркын көрсөткөн сунуштарды 25-мартка чейин genplan@meria.kg дарегине жөнөтүүнү суранат.

Маалымдалгандай, шаардын аймагын көрктүү жана пландуу өнүктүрүүнү камсыз кылуу максатында муниципалитет 15 жылдан ашык тажрыйбасы бар архитектура, шаар куруу, шаар дизайны же ландшафттык архитектура чөйрөсүндө иш алып барган жеке жана юридикалык жактардан шаардын 2050-жылга чейин курулуш өнүгүшү боюнча концептуалдык идеяларды жана сунуштарды кароого даяр.

"Шаар куруунун советтик үлгүсүнөн рыноктук мамилелерге өтүүдө аймактарды шаар куруунун заманбап ыкмаларын жана методологияларын эске алуу менен коомдун маданий-тарыхый мурасын, салттуу негиздерин жана менталитетин чагылдырган шаарды өнүктүрүү концепциялары күтүлүүдө. Концепция Бишкек шаарынын башкы планын иштеп чыгуу үчүн негиз болот", - деп айтылат маалыматта.

Мэрия кошумча суроолор боюнча: 0312 97 99 42; 0 (505) 55 - 13 - 85 номурларына кайрылса боло тургандыгын эскертет.

Автор: Замира Ниязбекова