Херардо Мартино: “Мессинин карьерасы тасмага жазылган сценарий сыяктуу”

Кечээ, 8-январь түнү Испаниянын кубогунун алкагында “Барселона”-“Хетафе” беттеши орун алып, оюн 4:0 эсебинде каталондук клубдун жеңиши менен аяктады. Бул тууралуу испаниялык маалымат булактары кабарлады.

Маалыматка ылайык, бул оюнда “Барселонанын” аргентиналык чабуулчусу, жаракатынан кайтып келген Лионель Месси 2 гол киргизди. Дагы 2 голду Сеск Фабрегас өз эсебине жаза алды.

Оюндун жыйынтыгында команданын башкы машыктыруучусу Херардо Мартино: “Мессинин карьерасы тасма үчүн даярдалып жазылган сценарий сыяктуу. Ал 3 мүнөт ичинде 2 гол киргизе алды”,-деп билдирди.

Мартинонун айтканынын жөнү бар. Анткени ал футболчуну кичинекей кезинде машыктырган. Мартинонун “Барселонада” иштеп калуусуна Мессинин аралашуусу болгону футбол коомчулугуна маалым.