51 жыл көгүлтүр экранда эмгектенген Бактыбек Мамытов быйыл көзү тирүү болгондо 75 жашка толмок 

Кыргыз телесинин жүзү, Кыргыз Республикасынын Эл артисти Бактыбек Мамытов көзү тирүү болгондо быйыл 3-мартта 75 жашка толмок.

Бактыбек Мамытов 1950-жылы 3-мартта Чүйдүн Ысык-Ата районундагы Алмалуу айылында жарык дүйнөгө келген. Атасы Камчыбек менен энеси Сакен карапайым адамдар болушкан. Бактыбек Мамытов 7 бир туугандын улуусу болгондуктан ата-энеси аны чоң энесинин колуна беришкен. Мындан улам бала кезинде өз атасын байке, апасын Сакен деп атынан айтып чоңойгон. Кичинекей Бактыбек 4-класска чейин өз айылында окуп, кийин 8-класска чейин 3,5 чакырым алыстыктагы кошуна айылга жөө барып билим алуусун уланткан.

Айылдагы мектепти бүтүргөн соң алгач ата-энесинин кеңеши менен айыл чарба институтуна тапшырган. Бирок сынактан кулап өтпөй калып, кийинки жылы өзү каалаган Кыргыз улуттук университетинин филология факультетине окууга таршырууну пландаган. Бирок жаш жигит тапшырган окуусуна өтпөй, мунусунда да сынактан кулап калат. Ошентип өжөрлүк менен окууга тапшыруу үчүн тынымсыз аракет кылып, төрт жылдан кийин гана өзү каалаган окуусуна өткөн.

Жогорку окуу жайда билим алып жүргөндө телерадиодо алып баруучулукка сынак жарыяланат. Коңур үндүү жаш жигит сынактан өтүп, 21 жашында радиодо эмгектенип калат. Алгач радиоэфирлерге чыгып жүрүп, кийин теледеги эфирлерди алып бара баштайт.

Бактыбек Мамытов таланттуу замандаштары: Жолдубай Кайыпов, Сатыбалды Жээнбеков, Тамара Алсеитова, Тамара Жаманбаева, Гүлшан Молдоева сыяктуу кесиптештери менен теледе бир топ жыл чогуу эмгектенген. Ал өлкөнүн башкы телеканалында жалпысынан жарым кылымдан ашык, тагыраагы, 51 жыл иштеген. Мамытов көп жылдар бою КТРКдагы "Арноо концертин" алып барып, коңур үнү менен элдин эсинде калды.

Чыгармачыл инсанда алып баруучулуктан тышкары акындык дагы өнөрү болгон. Анын жазган айрым ырларын ырчылар азыркы күндө аткарып келишет.

Бактыбек Мамытов өмүрлүк жары Жамийла Омокеева менен студент кезинде таанышып, баш кошушкан. Андан кийин түгөйлөр бир жерде чогуу иштешкен. Жубайы радиодо 19 жыл режиссёр болуп эмгектенген. Экөө 49 жыл бирге түтүн булатып, үч уул, эки кызды тарбиялап өстүргөн.

Бактыбек Мамытов маданиятка кошкон салымы үчүн көптөгөн сыйлыктарга ээ болгон. 2000-жылы Кыргыз телекөрсөтүүсүнүн отличниги, 1993-жы­лы Кыргыз Республикасынын Эмгек сиңирген артисти, 2006-жылы Даңк медалы жана башка бир топ сыйлыктарга та­тыган. Көптөгөн жылдар бою "Арноо концерти" көрсө­түүсүнүн редактору жана алып баруучусу, КТРдин алдындагы "ТВ-студиясынын" диктору болгон.

Диктордун 2021-жылы жубайы Жамийла Омокеева менен бирге SUPER.KG порталына үй-бүлө, турмуш, эки адамдын ортосундагы мамиле тууралуу берген акыркы маектеринин бирин төмөнкү видеодон көрө аласыз.