ӨКМ Ош облусундагы жер титирөөдөн жабыркаган турак жайлар боюнча маалымат берди

Ош облусунун аймагында 12-мартта саат 09:11де катталган жер титирөөнүн кесепетинен дубан боюнча жалпы 25 турак үй, 12 мектеп, 1 бала бакча жана 1 үй-бүлөлүк дарылоо тобу жабыркаган. Бул туурасында ӨКМдин маалымат борбору билдирди.

Маалымдалгандай, Алай району боюнча 13 турак үй, анын ичинен 1 турак үй кооптуу. Ошондой эле Жаңы-Алай айылында турак үйлөрдүн дубалдарында жаракалар пайда болгон. Жалпы аталган райондо жабыркаган 7 турак үй камсыздандыруудан өткөн, 6 турак үй камсыздандырылган эмес.

Ал эми Кара-Суу району боюнча 12 мектеп, 12 турак үй, 1 бала бакча, 1 үй-бүлөлүк дарылоо тобу жабыркаган.

Жоош айыл аймагынан 7 мектептин, 1 бала бакчанын, 1 турак үйдүн, Ала-Тоо айыл аймагынан 1 мектептин, Датка айыл аймагынан 3 мектептин, Мады айыл аймагынан 7 турак үйдүн, 1 үй бүлөлүк дарылоо тобунун, Савай айыл аймагынан 1 мектеп, 3 турак үйдүн,
Баш-Булак айыл аймагынан 1 турак үйдүн дубалында жаракалар пайда болгондугу маалыматта кошумчаланган.

Аталган райондогу жалпы 4 турак үй камсыздандыруудан өткөн, калган үйлөр камсыздандырылган эместиги маалыматта белгиленген.

ӨКМ жеринде райондук жарандык коргонуу комиссиясы иш алып барып жатканын билдирди.

Автор: Замира Ниязбекова