Ошто Жолон Мамытовдун 85 жылдыгына карата 5 мамлекеттин жаш акындар сынагы өтөт

Ош шаарынын мэри Жеңишбек Токторбаев Түрксой уюмунун башкы катчысы Султан Раевди кабыл алды. Бул туурасында мэриядан кечээ, 26-мартта кабарланды.

Маалымдалгандай, жолугушууда залкар акын Жолон Мамытовдун 85 жылдык мааракесине карата биринчи түрк дүйнөсүнүн жаш акындарынын поэзия фестивалын өткөрүү тууралуу сүйлөшүлдү. Иш-чара Түрксой эл аралык уюму тарабынан мэриянын колдоосу менен 28-30-майда өткөрүү пландалган.

Шаар башчысы Ош шаарында өтүүчү фестивалды уюштурууда ар тараптуу колдоо көрсөтүлөрүн билдирди.

"Фестивалга Азербайжан, Казакстан, Өзбекстан, Түркия, Түркмөнстан жана Кыргызстандын жаш акындары катышат. Иш-чара Ош шаарынын маданий брендин жайылтуу жана түрк тилдүү өлкөлөрдөн келген коноктор үчүн маданияттар аралык дараметин жогорулатуу максатын көздөйт", - деп айтылат маалыматта.

Автор: Замира Ниязбекова