"Элди ойлошубуз керек". Депутат аймактарга каттаган таксисттердин көйгөйүн көтөрдү (видео)

Бишкектен жети дубанга каттаган таксисттер үчүн унаа токтотуучу жай көйгөй болууда. Бул туурасында Жогорку Кеңештин депутаты Таалайбек Сарыбашов парламенттин бүгүн, 23-апрелдеги жыйынында билдирди.

Ал автобекеттер шаар четине чыгарылганын эске салып, эл ал жакка барбай, таксисттер калаанын ар кайсы бурчунан аймактарга каттап жатканын айтты.

"7 облустун райондорунан борборго тынымсыз эл келип турат. Акыркы күндөрү региондорго кеткен таксисттер үчүн унаа токтотуучу жайлар көйгөй болуп жатыптыр. Элди ойлошубуз керек. Шаардын сыртына автобекет уюштуруп бериптир, бирок ал жакка эл барбай, азыр шаардын ар жеринен качып-качып аймактарга каттап жатышат", - деди Сарыбашов.

Эл өкүлү бул маселе боюнча Бишкек шаардык мэриясы менен кеңешип, көйгөйдү чечип берүүнү сунуштап өкмөттүн парламенттеги өкүлү Алмазбек Абытовго кайрылды.

Эске салсак, былтыр Бишкек шаарындагы Чыгыш жана Батыш автобекеттеринин шаардын четине чыгарылган.