Латвия Украинага 1500 согуштук учкучсуз учактарды жеткирди

Латвиянын өкмөтү Украинанын Куралдуу күчтөрүнө 1500 согуштук учкучсуз учактарды жөнөттү. Бул тууралуу 29-апрелде республиканын коргоо министри Андрис Спрудс билдиргенин чет элдик басылмалар жазышууда.

"Дагы 1500 даана согуштук учкучсуз учак Латвиядан Украинаны көздөй баратат", - деп жазган ал өзүнүн X социалдык тармагындагы баракчасына.

Спрудс кошумчалагандай, 2025-жылдын биринчи жарымында эки латвиялык компания Украинанын Куралдуу күчтөрүнө дагы 12 миң учкучсуз учак жиберет.

Кошумчалангандай, 22-апрелде Улуу Британия Украинага учкучсуз учуучу аппараттарды жеткирүү боюнча 40,1 миллион долларлык келишимге кол койгон. Тиешелүү документтер Жаңы Зеландия менен кызматташуунун алкагында түзүлгөнү айтылды.

Автор: Замира Ниязбекова