Астанада аскердик парадда Казакстандын желеги асманда тартылды (фото, видео)

Казакстандын баш калаасы Астана шаарында Улуу Ата Мекендик согуштагы жеңиштин 80 жылдыгына карата аскердик парад өттү. Бул тууралуу бүгүн, 7-майда казак басылмалары байма-бай жазышууда.

Tengrinews.kz басылмасы жазгандай, иш-чарага төрт миңден ашык аскер кызматкери катышып, 200дөн ашык аскердик техника, ошондой эле фронт, армия жана аскердик транспорт авиациясынын 66 учагы жана тик учактары көрсөтүлдү.

Парадга Коргоо министрлигинин, Улуттук гвардиянын, Өзгөчө кырдаалдар министрлигинин жана Мамлекеттик күзөт кызматынын аскер кызматкерлери катышты.

Президент Касым-Жомарт Токаев өз сөзүндө Улуу Жеңиш улуттук тарыхтын ажырагыс бөлүгү жана бүткүл дүйнө үчүн маанилүү сабак болгонун баса белгиледи.

"Биз өз мекенин баатырларча коргогон ата-бабаларыбыздын эрдиктерин урматтайбыз. Ата мекен үчүн салгылашууларда курман болгондордун жаркын элесине таазим этебиз. Тынчтык учурда да өлкөнүн коопсуздугун камсыздап жаткан жоокерлерге да терең урмат көрсөтөбүз", - деген президент.

Борбор калаанын тургундары жана коноктору үчүн шаардын үч жеринде түз эфир уюштурулган. Иш-чара Казакстандын эстрада жылдыздарынын жана чыгармачылык топторунун катышуусунда майрамдык концерттер менен уланат.