Илон Маск Ак үйдөгү ишин жыйынтыктаганын жарыялады

Америкалык миллиардер жана АКШнын өкмөттүк эффективдүүлүк департаментинин башчысы Илон Маск президент Дональд Трамптын администрациясындагы кызмат мөөнөтү аяктаганын 29-майга караган түнү X социалдык тармагындагы аккаунту аркылуу жарыялады.

"Өкмөттүн атайын кызматкери катары мөөнөтүм аяктап жаткандыктан ысырапкорчулукка сарпталган чыгымдарды кыскартууга мүмкүнчүлүк берген президент Дональд Трампка ыраазычылык билдиргим келет", — деп жазган ал.

Маск ошондой эле өзү жетектеген Өкмөттүк эффективдүүлүк департаментинин мындан аркы өнүгүшүнө ишеним билдирди. Анын айтымында, мекеме убакыт өткөн сайын бекемделип, бүтүндөй өкмөттүн жашоо образына айланат.

Автор: Замира Ниязбекова