Эверестти багындырган айымдарга сыйлыктар тапшырылды

Бүгүн, 4-июнда Эверестти багындырган Асел Байбагышева жана Рысгүл Акимжановага Жогорку Кеңештин Ардак грамотасы жана Ыраазычылык каты тапшырылды. Бул тууралуу министрлер кабинетинин маалымат кызматы билдирди.

Маалым болгондой, бүгүн Жогорку Кеңештин айым депутаттар форумунун кезектеги жыйыны өттү. Форумга катышкан эл өкүлдөрү кыргызстандык эки айымды Эверестти багындырып, өлкөнүн желегин желбиретип келгени үчүн ыраазычылыгын билдирип куттукташты.

"Эвересттин чокусуна эрки күчтүүлөр гана чыккан сейрек көрүнүш экенин белгилеп, эл өкүлдөрү кыргыздын кыйын кыздарынын тизмеси Асел Байбагышева жана Рысгүл Акимжанова менен толукталганын айтышты",- деп айтылат маалыматта.

Ошондой эле жыйында эл агартууга кошкон салымы үчүн мугалим Жылдыз Койчумановага да Жогорку Кеңештин Ардак грамотасы ыйгарылды.

Автор: Ширин Марат кызы
Фото: министрлер кабинети