Жакыр үй-бүлөдө жашаган 500 бала жайкы эс алууга жөнөтүлдү

Аярлуу категориядагы балдардын биринчи агымы эс алууга жөнөтүлдү. Бул тууралуу бүгүн, 10-июнда Эмгек, социалдык камсыздоо жана миграция министрлигинен билдиришти.

Маалыматка ылайык, балдардын эс алуусу 10-июндан 22-июлга чейин созулат. Биринчи агымга Чүй облусунан, Бишкек шаарынан, Ысык-Көл жана Нарын облустарынан 500 бала жөнөтүлүүдө.

Жалпысынан программада 6 агым пландалууда, ага 1000 өспүрүм жана 200 майыптуулугу бар балдар кирет. Акыркысы сентябрь айында "Алтын-Балалык" борборунда реабилитациядан өтөт.

“Жайкы эс алууларды уюштурууга мамлекеттик бюджеттен 15 миллион сом бөлүндү. Мындан тышкары, 2024-жылдын сентябрынан 2025-жылдын февралына чейин ден соолугунун мүмкүнчүлүгү чектелген 600 балага президенттин резервдик фондунан колдоо көрсөтүлгөн”, – деди министр Равшанбек Сабиров.

Белгилей кетсек, ар бир агым сөзсүз түрдө майыптуулугу бар балдарды камтыйт. Программа жайкы мезгилде калктын социалдык аярлуу катмарындагы балдардын ден соолугун жана бакубаттуулугун колдоого багытталган.

Автор: Ширин Марат кызы
Фото: Эмгек, социалдык камсыздоо жана миграция министрлиги