Иран жаңы куралдар менен Израилге дрон соккуларын күчөтөт

Иран Израилге каршы жаңы жана өнүккөн куралдар менен оор дрон чабуулдарын баштаганын жана алдыдагы сааттарда бул чабуулдар мындан да күчөй турганын жарыялады. Бул тууралуу Иран армиясынын кургактагы күчтөрүнүн командачысы Кеймарс Хайдари мамлекеттик телеканал аркылуу билдирди.

Хайдаринин айтымында, буга чейинки түндө жана күндүз Израилге каршы таасирдүү жана жогорку тактыктагы дрондор менен өч алуу чабуулдары жасалган. Ал дрондор "сионисттик режимдин" Тель-Авив жана Хайфедеги стратегиялык объекттерин бутага алып, кыйратканын белгиледи.

Бул окуялар Израилдин 13-июнда Ирандын бир катар шаарларындагы өзөктүк объекттерге жана аскердик жетекчилерге каршы кеңири масштабдуу чабуулунан кийин башталган. Ал чабуулда Ирандын Башкы штабынын башчысы, Коргоо корпусунун командачысы, 9 өзөктүк окумуштуу жана башка жогорку даражалуу аскерлер каза тапкан. Жалпы жарандык курмандыктар 224 адамды түзгөн.

Ирандын жооп иретиндеги баллистикалык ракета чабуулунда Израилде 24 адам каза болуп, 500дөн ашуун киши жаракат алган.

Автор: Жазгүл Жаңыбаева