Транспорт министрлиги жүк ташыган унаалардын айдоочуларына кайрылды

Ушул жылдын 19-майынан 1-июлуна чейин өлкө аймагындагы транспорттук көзөмөл пункттарында 35 миң 259 жүк ташуучу унаа убактылуу токтотулду. Бул тууралуу Транспорт министрлиги билдирди.

Ал эми “жылуулук режимин” аткарбай, талапка баш ийбеген 141 айдоочуга Укук бузуулар жөнүндө кодексинин 181-беренесинин 4-бөлүгү менен жалпы 2 миллион 450 миң сом айып пул салынды.

Белгилей кетсек, ушул жылдын 19-майынан 1-сентябрына чейин абанын күндүзгү температурасы 28ºС жана андан жогору болгон учурда болжол менен эртең мененки саат 10:00дөн кечки саат 20:00гө чейин жүк ташыган унаалардын жалпы пайдалануудагы жолдордо жүрүүсүнө убактылуу чектөө киргизилген.

Мында максималдуу жалпы массасы 18 тоннадан ашкан оор жүк ташуучу унаалардын кыймылына тыюу салынат.

"Ашыкча жүк жүктөгөндөн алыс болуп, жолдун сапатын сактоого салымыбызды кошолу",- деп жазылат маалыматта.