Сууда сүзүүчү Денис Петрашов Дүйнө чемпиондугунун финалына чыкты

Сууда сүзүү боюнча Сингапурда өтүп жаткан Дүйнө чемпиондугунда Кыргызстандын атынан катышып жаткан спортчу Денис Петрашов финалга өттү. Бул тууралуу мелдештин расмий сайтында маалымдалды.

27-июлда ал 100 метр аралыкка брасс ыкмасы менен сүзүү боюнча жарышка түшүп, эртең мененки алдын ала этапта 59,53 секунд көрсөттү. Бул жыйынтык менен өз тайпасында 3-орунду ээлеп, жарым финалга 8-орун менен жолдомо алды.

Жарым финалда биринчи тайпада сүзүп, убакытты 59,20 секундга жакшырткан Петрашов 4-орунга жетип, жалпы эсепте 6-орун менен финалга чыкты.

Финалдык таймаш бүгүн, 28-июлда Бишкек убактысы боюнча саат 17:00дө өтөт.

Автор: Максуда Кудайбердиева