Ош шаарындагы көчөгө казак акынынын ысымы ыйгарылып, эстелиги тургузулат

Ош шаарынын Волгоград жана Тимирзяев көчөлөрүнө казак акыны Абай Кунанбаевдин ысымы берилип, эстелиги тургузулат. Бул тууралуу калаа бийлиги билдирди.

Маалыматка ылайык, бүгүн, 26-августта шаар башчысы Жеңишбек Токторбаев Казакстандын Оштогу башкы консулу Мухтар Карибай менен Өзбекстандын башкы консулу Зафарбек Ахмеводго аталган көчөлөрдү тааныштырып чыккан.

"Көчөлөр капиталдык оңдоп-түзөөдөн өткөрүлүп, жумуш дээрлик аяктап калды. Көчөнүн узундугу 3 чакырым 800 метр. Алдыңкы бир ай ичинде көчөнүн башына акындын айкели коюлуп, чакан сквер уюштурулат. Абай Кунанбаев коомдук-саясий жана философиялык ой-пикирлери менен казак элинин билим, маданият жана адабият тармагына зор салым кошкон.

Ош шаарында көчөлөргө Абай Кунанбаевдин ысымын берүү - улуу акындын мурасына урмат көрсөтүү, жаштарды билимге жана маданиятка чакыруу менен бирге кыргыз-казак боордоштугун чыңдоонун дагы бир далили болуп саналат",- деп айтылат маалыматта.

Автор: Кылымбек Бейшеев
Фото: Ош шаарынын мэриясы