Спортчулар ок атуу боюнча Азия чемпиондугунда эки коло медалга ээ болушту

Кыргызстандык спортчулар ок атуу боюнча Азия чемпиондугунда эки коло медалга ээ болушту. Бул тууралуу Дене тарбия жана спорт мамлекеттик агенттиги билдирди.

Маалыматка ылайык, 16-августтан тарта 28-августка чейинки аралыкта Казакстандын Шымкент шаарында ок атуу боюнча 16-Азия чемпиондугу өтүп жатат. Мелдешке 29 мамлекеттен жалпы 756 спортчу катышууда.

Аталган мелдеште Кыргызстандын курама командасы ПП-60 (тапанча), ВП-60 (мылтык) жана МВ-60 (мылтык) атуу түрлөрүндө жакшы жыйынтык көрсөттү. Жуптар арасындагы таймаштарда тапанча атуу боюнча Анвар Ибраимов менен Кайыргүл Кубанычбекова коло байге тагынышты. Мылтык атуу мелдешинде Абдураззак Муратов менен Жибек Бекташова коло медаль алышты.

Фото: Дене тарбия жана спорт агенттиги