Кыймылсыз мүлккө салык төлөөнүн мөөнөтү 1-сентябрда аяктайт

Кыймылсыз мүлк салыгын төлөө мөөнөтү 1-сентябрда аяктайт. Бул тууралуу Салык кызматынан билдиришти.

Маалым болгондой, салык өз убагында төлөнбөсө, ар бир кечиктирилген күн үчүн 0,09 пайыз өлчөмүндө айып салынат.

Мекемеден билдиришкендей, январь-август айларында турак жайлардан же имараттардан түшкөн салыктын суммасы 19,4 миллион сомду түзгөн. Ал эми үй жанындагы, короо-жай жанындагы жана бак-чарба жер участокторунан 12,5 миллион сом салык түшкөн. Автоматтык түрдө эсептөө модулу аркылуу салык төлөөчүлөрдүн кабинеттерине 2 миллион 377 миң 232 билдирүү жөнөтүлгөн.

Эске салсак, жарандар өздөрүнүн электрондук кабинеттерин текшерип, эсептелген сумма менен таанышып, 1-сентябрга чейин төмөнкү салыктарды төлөшү керек:
– турак үйлөргө, батирлерге салык (ишкердик иш үчүн пайдаланылбаган),
– үй жанындагы, короо-жай жанындагы жана бак-чарба жер участокторуна салык.

Быйыл төлөнө турган салыктын суммасы жөнүндө маалымат салык төлөөчүнүн кабинетине жиберилди. Салыкты төлөө төлөм кодун же QR-кодун түзүү жолу менен жүргүзүлөт.

Мүлк салыгы, аны төлөө тартиби жана берилген жеңилдиктер жөнүндө толук маалыматты жергиликтүү салык органдарынан, ошондой эле 116 номеринен же www.sti.gov.kg сайтынан алууга болот.

Автор: Айсулуу Урустамова