Футболчу Эмил Кенжесариевди сабаган Казакстандын жараны 3 жылга кесилди

Белгилүү футболчу Эмил Кенжесариевди сабаган деген шек менен кармалган Казакстандын жараны 20 жаштагы Бейбит Узакбай 3 жылга кесилди. Бул тууралуу кечээ, 15-январда казакстандык маалымат булактары кабарлады.

Маалыматка ылайык, түнкү клубдардын биринде күзөт кызматында иштеген Бейбит Узакбай соттук отурумда күнөөсүн моюнуна алып, бирөөнүн ден соолугуна оор залака келтиргендиги үчүн 3 жылга кесилди. Соттун чечими жакынкы 15 күн ичинде күчүнө кирет.

Эске салсак, футболдук ишмердүүлүгүн Кыргызстанда баштап, кийин казакстандык “Актөбе” клубунда ойногон Эмил Кенжесариев 2013-жылы 11-августка караган түнү Алматы шаарында оор абалда ооруканага жеткирилген. Комада жаткан футболчунун баш сөөгү кесилип, дароо операция жасалган. Ага акыркы операция Израилде жасалып, жыйынтыгы жакшы экени маалымдалган.

Автор: Максат Кудайбердиев