Абактагы Тилекмат Куреновдун абалы айтылды (видео)

Тергөө абагындагы жарандык активист Тилекмат Куреновдун (Кудайберген уулу) абалы жакшы. Бул тууралуу SUPER.KG порталына бүгүн, 17-сентябрда анын жактоочусу Айбек Турдуев билдирди.

Адвокаттын маалыматына ылайык, учурда Куренов Бишкектеги №21 тергөө абагында (ред.: эл арасында СИЗО №1 деп айтылып келет) кармалып жатат.

Учурда Бишкектин Ленин райондук сотунда Куреновдун бөгөт чарасы каралууда.

Эске салсак, ал БАЭден кармалып, 19-апрелде өлкөгө жеткирилген. Аны 21-апрелде Бишкектин Биринчи май райондук соту камакка алган.

УКМК май айында Куреновдун сотко аксап, таякчан келген себебин анын өнөкөт омуртка оорусу (грыжа) менен байланыштырган. Социалдык тармактарда анын ур-токмокко алынганы тууралуу жоромолдорду жокко чыгарган. Куреновдун жактоочусу айрым жергиликтүү маалымат каражаттарына анын өнөкөт омуртка оорусу бар экенин билдирген.