Саламаттык сактоо министрлиги Бишкекте холера тарап жатат деген маалыматты төгүндөдү

Саламаттык сактоо министрлиги социалдык тармакта тараган Бишкек шаарында холера илдети тарап жатат деген маалыматты төгүндөдү.

Мекеме билдиргендей, өлкөдө эпидемиологиялык абал туруктуу жана көзөмөлдө.

"Акыркы жолу Ош шаарынан, Араван жана Кара-Суу райондорунан алынган үлгүлөрдө холера вибриону аныкталган. Бирок ал адам үчүн коркунучтуу эмес жана классикалык холерадагыдай эпидемиялык потенциалы жок",- деп билдирди мекеме.

Эпидемиялык коркунуч жок болгонуна карабастан, толук көлөмдө тиешелүү чаралар көрүлгөн.

Адистер ичеги-карын инфекцияларынан сактануу үчүн кайнатылган же бөтөлкөдөгү сууну гана пайдаланууну, жашылча-жемиштерди таза жууп, кайнак суу менен чайкоо керектигин эскертишет.

Министрлик жарандарды маалыматты расмий булактардан гана алууга жана тастыкталбаган маалыматтарды таратпоого чакырат.

Автор: Айжанар Рыспек кызы