Кыргызгидромет жаан-чачынга байланыштуу билдирүү таратты

Кыргызгидромет кызматы билдиргендей, Кыргызстандын аймактарында 1-октябрда туруксуз аба ырайы күтүлөт. Бул күнү көпчүлүк аймактарда жамгыр, тоолуу райондордо кар жаашы күтүлөт. Айрым жерлерде жаан-чачын катуу жаашы ыктымал.

Абанын температурасы төмөндөйт:

Чүй жана Талас өрөөндөрүндө +11…+16,
Ош, Жалал-Абад, Баткен облустарынын өрөөндөрүндө +16…+21,
Ысык-Көл жана Нарын облустарынын дыйканчылык аймактарында +9…+14°, тоолуу райондордо +1…+6°, бийик тоолуу райондордо -1…+4° грауска чейин болушу күтүлөт.

Мындай туруксуз аба ырайы автоунаа, энергетика жана коммуналдык кызматтардын ишин жана жайыттарда малды кармоону кыйындатат.

Ал эми 2-октябрда түнкүсүн Чүй, Талас, Ысык-Көл, Нарын облустарынын дыйканчылык аймактарында айрым жерлеринде -1…-3° үшүк жүрүшү күтүлөт. Мындай үшүк мөмө жана жашылча жемиштерге, казылып алынган жана жабылбаган картошка, кант кызылчасы үчүн коркунучтуу.

Батыштан соккон шамалдын ылдамдыгы секундасына 4-9 метрден, айрым жерлерде 15-20 метрге жетиши күтүлөт.

Автор: Айжанар Рыспек кызы
Фото: интернеттен алынды