Чүйдө апасына зомбулук көрсөткөн жаран кармалды

Чүй облусунда апасына зомбулук колдонуп жүргөн деген шек менен жаран кармалды. Бул тууралуу Чүй облусунун ИИББинин басма сөз кызматы кабарлады.

Маалыматка ылайык, Сокулук районунун Күн-Туу айылында 36 жаштагы А.Н. аттуу жаран мас абалында өзүнүн 65 жаштагы апасына карата системдүү түрдө психологиялык басым көрсөтүп, физикалык зомбулук колдонуп жүргөн.

Бул факт каттого алынып, Кылмыш-жаза кодексинин 138-беренесинин (Кыйноо) белгилери боюнча кылмыш иши козголгон.

Тергөө учурунда шектүү буга чейин да өз энесине ушундай мүнөздөгү мыйзамсыз аракеттерди жасагандыгы аныкталган. Үй-бүлөлүк зомбулуктун үч фактысы боюнча райондук милиция тарабынан Бузуулар кодексинин 70-беренесине (Үй-бүлөлүк зомбулук) ылайык тиешелүү протоколдор түзүлгөн.

Жүргүзүлгөн ыкчам-иликтөө иш-чараларынын жыйынтыгында А.Н. аттуу жаран ЖПКнын 96-беренесине ылайык камакка алынып, убактылуу кармоочу жайга киргизилди. Соттун чечими менен ага камакка алуу түрүндөгү бөгөт чарасы тандалды.

Кылмыш ишинин алкагында бардык керектүү экспертизалар дайындалып, тергөө иштери уланууда.

Автор: Жазгүл Жаңыбаева