Төө-Ашууда кар. Жүк ташуучу унааларга киргизилген чектөө күчүндө (видео)

Бүгүн, 29-октябрда Бишкек-Ош жолундагы Төө-Ашуу жана Ала-Бел ашууларындагы оор жүк ташуучу унааларга киргизилген чектөө күчүндө. Бул тууралуу Транспорт жана коммуникациялар министрлиги билдирди.

Маалыматка ылайык, учурда аталган жол тилкелеринде кар жаап, жол тазалоо иштери тынымсыз жүрүүдө.

"Суусамыр-Талас-Тараз жолундагы Өтмөк ашуусунда унаалардын бардык түрүнө убактылуу жол жабык. Азыркы тапта № 36 Жол тейлөө ишканасы тарабынан тазалоо, жолго кум себүү иштери жүрүп жатат. Бир саат аралыгында жеңил унааларга каттам берилери күтүлүүдө",- деп билдирди министрлик.