Токмокто ооруканада чыр салган мас айдоочуга кылмыш иши козголду

Токмок шаарындагы ооруканада чыр салган 32 жаштагы киши камакка алынды. Бул тууралуу Чүй облустук ички иштер башкармалыгы билдирди.

Маалыматка ылайык, бир апта мурун, тагыраагы, 2-ноябрда милицияга дарыгерлерди сөгүп, алардын бирине кол көтөрүп, оорукананын терезесин сындырган жаран тууралуу маалымат түшкөн. Бул факт боюнча Кылмыш-жаза кодексинин 280-беренеси (Бейбаштык) менен кылмыш иши козголуп, шектүү убактылуу кармоочу жайга киргизилген.

Ал эми соттук-лингвистикалык экспертизанын жыйынтыгы менен анын айткандары улут аралык кастыкты козуткан мүнөздө экени аныкталган. Бул факт боюнча Кылмыш-жаза кодексинин 330-беренеси (Расалык, этностук, улуттук, диний же региондор аралык кастыкты козутуу) менен кылмыш иши козголуп, ал 2 айга камакка алынган.

Учурда тергөө иштери уланууда.

Эске салсак, аны Токмок шаарындагы ооруканага жол тескөөчүлөр алкоголдук ичимдиктерин ичкенин аныктоо үчүн текшерүүгө алып келишкен.

Автор: Кылымбек Бейшеев