Бишкек ШИИББи: Адвокат Икрамидин Айткуловдун сабалышы боюнча кылмыш иши уланууда

Адвокат Икрамидин Айткуловдун белгисиз адамдар тарабынан сабалышы боюнча кылмыш иши токтотулган жок. Азыркы тапта ага кошумча мөөнөт берилип, тергөө 1 айга узартылды. Бул тууралуу 20-январда Бишкек ШИИББинин басма сөз кызматы билдирди.

Маалыматка ылайык, аталган иш боюнча жабырлануучу шектеп жаткандардын баары сурак беришкен. Адвокаттын ден соолугуна оор зыян келтирилгендиктен, кайрадан соттук-медициналык экспертизадан өтүүгө жөнөтүлдү.

Белгилей кетсек, Икрамидин Айткулов өзүнүн сабалганы боюнча козголгон кылмыш иши токтотулганын 13-январда айтып чыккан. Ал ИИМ, Бишкек ШИИББи кол салууну өз көзөмөлүбүзгө алабыз деген сөздөрүнө турбай, кылмыш ишин Свердлов РИИБинин жаш тергөөчүсү карагандыгын билдирген эле.

Эске салсак, 13-ноябрь күнү кечинде Икрамидин Айткуловду сабап кетишкен. Адвокаттын буту, тиштери сынганы, акчасы уурдалганы айтылып, шаардагы №4-ооруканага жаткырылган.

И.Айткулов 2012-2013-жылдары сотто Жогорку Кеңештин мурунку депутаты Камчыбек Ташиевге жактоочулук кылган.

Автор: Айпери Ганыжан кызы