Талас облусунда мас абалындагы айдоочу мектеп окуучуларын сүзүп кетти

Талас облусунун Манас районундагы жол кырсыгы боюнча тергөө иштери жана тийиштүү экспертизалар жүргүзүлүүдө. Бул тууралуу 20-январда ИИМдин басма сөз кызматы билдирди.

Буга чейин 15-январда Кербен–Май–Талас унаа жолундагы жол кырсыгынан мектеп окуучулары жаракат алганы айтылган. Саат 17:30дар чамасында 35 жаштагы Манас районунун тургуну К.У. Мерседес-Бенц 230 унаасын айдап бара жатып рулду башкара албай калган. Жолдон чыгып кеткен унаа мектеп окуучуларын сүзгөн. Текшерүүдө айдоочунун мас абалында болгону аныкталган.

Кырсыктын кесепетинен 13 жаштагы 4 мектеп окуучусу ар кандай жаракаттар менен аймактык ооруканага жеткирилген. Жабыр тарткандардын ата-энелери жергиликтүү РИИБине арыз менен кайрыла элек. Азыркы тапта окуя боюнча кылмыш ишин ачуу каралууда.

Автор: Айпери Ганыжан кызы