Бишкекте жол кырсыгына учурап, эки жолу качууга аракет кылган мас айдоочу кармалды

Бишкекте мас абалдагы айдоочу жол кырсыкка учурап, эки жолу качууга аракет кылды. Бул тууралуу бүгүн, 20-январда ИИМдин Жол-кайгуул кызматы билдирди.

Маалыматка таянсак, 18-январда саат 17:00 чамасында Манас-Бөкөнбаев көчөлөрүнүн кесилишинде Фольксваген Гольф жана Лексус RX-300 үлгүлөрүндөгү унаалар кагышкан. Биринчи унаанын айдоочусу мас абалда экен. Жол-кайгуул кызматчылары келгенде ал паспортун таштап, унаасын айдап качып кеткен. Андан соң кырсык болгон жерге 18 жаштагы баланы алып келип, “рулда ушул бала болчу” деп күнөөнү ага оодара салган. Жол-кайгуул кызматкерлери кырсык фактысы боюнча материалдарды толтуруп жатканда мас айдоочу кайра качып кеткен.

Кечээ, 19-январда айдоочунун жашаган жерин аныктап, анын унаасы айып пул төлөөчү жайга токтотулган. Учурда тергөө иштери жүргүзүлүүдө.

Автор: Нургазы Аматов