Дагы бир шаардын мэриясы Жаңы жылдык кечелерди өткөрбөй турган болду

Манас шаарынын мэриясы жана мэриянын карамагындагы бардык мекеме-ишканалар 2025-жылга карата Жаңы жылдык корпоративдик кечелерди өткөрбөйт. Бул тууралуу шаардык мэриядан билдиришти.

Бул чечим ысырапкорчулуктун алдын алуу жана бул багытта жарандарга үлгү көрсөтүү максатында кабыл алынды.

Манас шаарынын мэриясы мекеме-ишканаларга Жаңы жыл майрамын жылдын жыйынтыгы катары расмий иш-чараларды өткөрүү менен гана чектелип, кошумча чыгымдарсыз тосуп алууну эскертет. Ошондой эле, Жаңы жылдык кечелердин ордуна шаардагы социалдык жактан аз камсыз болгон үй-бүлөлөргө, социалдык мекемелерге көмөк көрсөтүүнү сунуштайт.

Белгилей кетсек, буга чейин Бишкек мэриясы борбордук аппаратта жана карамагындагы түзүмдөрдө корпоративдик Жаңы жылдык иш-чараларга чектөө койгону маалымдалган.

Автор: Айсулуу Урустамова
Фото: интернеттен алынды