Оштун мэри тапанча атып, жөө күлүктөрдү чуркатты

Ош шаарында жайгашкан Сүйүмбаев атындагы борбордук стадиондо ФИФАнын талаптарына жооп берген гибриддик футбол талаасы курулуп, чуркоочу аянтчага заманбап резина каптама төшөлдү.

Калаа мэриясы бүгүн, 15-декабрда негизги курулуш иштери толук аяктап, расмий түрдө пайдаланууга берилгенин кабарлады. Ачылыш аземине шаар башчысы Жеңишбек Токторбаев катышкан.

Иш-чаранын алкагында балдар жана кыздар арасында чуркоо боюнча спорттук мелдеш уюштурулуп, жеңүүчүлөргө кызыктыруучу сыйлыктар тапшырылган. Калаа бийлиги жарыялаган видеодон Токторбаев тапанчаны асманга карай атып, жөө күлүктөрдүн чуркоосуна старт бергенин көрүүгө болот.