Бишкекте ден соолукка залал келтирип, качып жүргөн жаран кармалды

Бишкекте ден соолукка залал келтирүүгө шектелип, издөөдө жүргөн жаран кармалды. Бул тууралуу шаардык милициядан билдиришти.

Маалым болгондой, 25-апрелде Свердлов райондук милиция бөлүмүнө С.Л. аттуу жаран арыз менен кайрылган. Анда 19-апрелге караган түнү саат 2:30 чамасында Б. жана М. аттуу жарандар аны сабап, денесине жаракат келтирип, окуя болгон жерден качып кеткени белгиленген.

Аталган факт боюнча Кылмыш-жаза кодексинин 131-беренеси боюнча кылмыш иши козголду. Ыкчам-иликтөө иштеринин жүрүшүндө 1988-жылы туулган М.Б. аттуу шектүү аныкталып, милиция бөлүмүнө жеткирилди.

Соттун чечиминин негизинде шектүү убактылуу кармоочу жайга киргизилди. Учурда тергөө иштери улантылууда.

Автор: Замира Ниязбекова