Казыбек Молдажиев Италиянын спорт министри менен жолугушту

Дене тарбия жана спорт мамлекеттик агенттигинин директору Казыбек Молдажиев Италиянын спорт жана жаштар иштери боюнча министри Андреа Абоди менен жолугушту.

Агенттик 7-февралда берген маалыматка таянсак, жолугушууда спорт тармагындагы эки өлкөнүн ортосундагы кызматташтык талкууланды.

Белгилей кетсек, Молдажиев 6-февралда Италияда өтүп жаткан Кышкы Олимп оюндарынын ачылыш аземине катышты. Бул мелдештерге Кыргызстандан 2 спортчу катышат.

Мелдештердин программасына ылайык, Тимур Шакиров тоо лыжасы боюнча гигант слалом мелдешине 14-февралда, ал эми слалом мелдешине 16-февралда катышат. Артур Сапарбеков болсо лыжа жарышы боюнча классикалык спринтке 10-февралда, ал эми эркин стилде (коньки тебүү ыкмасы менен) өтүүчү мелдешке 13-февралда чыгат.

Кышкы Олимпиада 22-февралга чейин уланат.

Автор: Айжанар Рыспек кызы
Фото: Дене тарбия жана спорт агенттиги