Чүйдө ишенип берилген малды сатып жиберүүгө шектүү кармалды

Чүй облусунда ишенип берилген мүлктү ыйгарып алуу жана коротуу фактысы боюнча шектүү кармалды. Бул тууралуу бүгүн, 11-февралда облустук милициядан билдиришти.

Маалыматка ылайык, М.Б. аттуу жарандын “К.Ж.” фермердик дыйкан чарбасында 1998-жылы туулган Ж.Э. аттуу жаран малчы болуп иштеген. Ал 2025-жылдын октябрь айында 50 баш музоону 2026-жылдын апрель айына чейин багууга милдет алган. Бирок 2026-жылдын январь айында аталган жаран өз алдынча малды сатып жиберип, түшкөн каражатты онлайн-казино оюндарында ысырап кылган. Материалдык зыяндын суммасы 3 миллион 700 миң сомду түзгөн.

Бул факт боюнча Кылмыш-жаза кодексинин 210-беренесине (Ишенип берилген мүлктү ыйгарып алуу жана коротуу) ылайык кылмыш иши козголду.

Ыкчам-издөө иш-чараларынын натыйжасында Ж.Э. кармалды. Учурда тергөө иштери уланууда.

Автор: Меерим Кабылова