Мекендештерин алдоого шектелип индиялык студент кармалды

Ош шаарында ири суммадагы акча каражатын алдап алууга шектелип 24 жаштагы индиялык студент кармалды. Бул тууралуу 23-мартта калаа милициясы билдирди.

Маалыматка ылайык, шектүү Ош шаарындагы жогорку окуу жайлардын биринде билим алат. Ал өзүнүн мекендештеринен ири суммадагы рупий (ред.: Индия валютасы) алып, аны долларга алмаштырып берүүнү убада кылган.

Учурда шектүүгө карата анын 9 мекендешинен арыз түшкөн. Алардын айтымында, алдап алынган каражаттын минималдуу суммасы 35 миң сомду (улуттук валютага которгондо), ал эми максималдуу суммасы 243 миң сомду түзгөн. Жалпысынан жабырлануучуларга келтирилген материалдык зыян 3 миллион сомдон ашкан.

Аталган факт боюнча Кылмыш-жаза кодексинин 209-беренеси (Алдамчылык) менен кылмыш иши козголуп, тергөө амалдары улантылууда.

Автор: Айжанар Рыспек кызы
Фото: Ош ШИИБ