Америкадагы мекендештер кыргыз күрөшү боюнча мелдеш уюштурушту (видео)

АКШнын Филадельфия шаарында алгач ирет кыргыз күрөшү боюнча “Philadelphia Open Cup” турнири өттү. Мелдешке Америкада жашаган кыргызстандык спортчулар катышып, алардын катарына Казакстан жана Египеттен барган балбандар да кошулушту. Жалпысынан 42 спортчу күч сынашты.

Турнирдин уюштуруучуларынын бири Талгат Өмүрбеков бул мелдеш быйыл Кыргызстанда өтө турган Көчмөндөр оюндарына арналып өткөрүлгөнүн билдирди. Анын айтымында, негизги максат - АКШда кыргыз күрөшүн жайылтуу жана өнүктүрүү.

Баш байгеге үч унаа коюлду. Иш-чарага миңге жакын көрүүчү келди.

Күрөш мелдешинен тышкары, жаа атуу жана ордо оюндары да уюштурулуп, көрүүчүлөр үчүн өзгөчө атмосфера жаратылды.

Жыйынтыгында, 90 килограммдан жогору салмакта Эмил Жоробеков унаага ээ болду. Ал эми 90 килограмм салмакта Нурматбек Мурат уулу биринчи орунду камсыздады. 75 килограмм салмакта Малик Жээнбеков чемпион аталды.