Ошто Сулайман-Тоону айланта веложол жана тротуар куруу сунушталды

Ош шаарынын мэри Жанарбек Акаев Маданият, маалымат жана жаштар саясаты министри Мирбек Мамбеталиев менен жолугушуп, маданият тармагындагы бир катар маселелерди талкуулады. Бул тууралуу шаардык мэриядан билдиришти.

Маалыматка ылайык, жолугушуунун жүрүшүндө Сулайман-Тоо улуттук тарыхый-археологиялык музей комплексин реконструкциялоо боюнча долбоор тааныштырылды. Шаар башчысы долбоорду ишке ашырууда ыкчам жана чечкиндүү кадамдар зарылдыгын белгиледи.

Мэр Сулайман-Тоону айланта веложол жана жөө жүргүнчүлөр үчүн тротуар курууну сунуштап, бул шаар тургундары жана туристтер үчүн ыңгайлуу шарт түзөрүн айтты.

Долбоорго ылайык, Сулайман-Тоонун жолдору, тепкичтери, дарбазалары жана музейлердин ички-тышкы бөлүктөрү толугу менен реконструкцияланат. Жалпы 12 бөлүктөн турган долбоор 3 этап менен ишке ашырылып, каржылоону Дүйнөлүк банк камсыздайт.

Ошондой эле жыйында Ак медресе имаратын калыбына келтирүү жана көрүстөндөрдү иретке келтирүү маселелери да каралды.

Автор: Айзада Кыдырмышева