Үй ээсин коркутуп... Кара-Балтада каракчылыкка шектелген жаран кармалды

Кара-Балта шаарында 31 жаштагы жаран каракчылыкка шектелип кармалды. Бул тууралуу Чүй облустук милициясы билдирди.

Маалыматка ылайык, ал 20-февраль түнү шаардагы үйлөрдүн бирине терезени сындырып кирип, үй ээсин коркутуп, ага дене жаракаттарын келтирген. Андан кийин анын сумкасындагы акча каражаттарын алып кеткен.

Бул факт боюнча Кылмыш-жаза кодексинин 207-беренеси (Каракчылык) менен кылмыш иши козголуп, шектүү убактылуу кармоочу жайга киргизилген. Кылмыш ишинин алкагында тиешелүү экспертизалар дайындалып, тергөө иштери уланууда.

Автор: Кылымбек Бейшеев
Фото: Чүй ОИИБ