Адылбек Касымалиевдин Казакстандагы иш сапары жыйынтыкталды

Министрлер кабинетинин төрагасы Адылбек Касымалиев 26-27-март күндөрү Казакстан Республикасына жасаган жумушчу сапарын аяктады. Бул тууралуу Министрлер кабинетинин басма сөз кызматынан билдиришти.

Маалыматка ылайык, сапардын алкагында ал Евразия өкмөттөр аралык кеңешинин кезектеги жыйынына катышты. Жыйында соода-экономикалык жана ар тараптуу кызматташтык маселелери каралып, ондон ашуун маселе талкууланып, бир катар документтерге кол коюлду.

Отурумга Евразия экономикалык биримдигине мүчө өлкөлөр — Беларусь, Казакстан, Кыргызстан, Орусия өкмөт башчылары, ошондой эле Армениянын вице-премьер-министри катышты.

Мындан тышкары, Касымалиев делегация башчылары менен бирге “Digital Qazaqstan – 2026” форумуна катышып, санарип долбоорлордун көргөзмөсү менен таанышып, пленардык жыйында сөз сүйлөдү.

Форумда санариптик майнинг, криптобиржа, киберкоопсуздук, билим берүү жана инновациялар сыяктуу актуалдуу темалар талкууланды.

Автор: Айзада Кыдырмышева