Оштун тургуну ажылыкка бара турган каражатына айылдаштарына жаңы көпүрө куруп берди (видео)

Бүгүн, 4-апрелде Ош шаарынын Озгур айылында жаңы көпүрө бүткөрүлүп, пайдаланууга берилди.

Мэриядан билдиргендей, бул көпүрө айыл жашоочусу Умарбек Атабеков тарабынан жеке каражатына курулуп, айылдаштарына белек катары арналды. Ал ажылыкка барууга деп чогулткан каражатын элдин керегине жумшоону туура көргөн. Анткени жаз мезгилинде Увам каналында суу көбөйүп, шаарды байланыштыруучу эски көпүрө кооптуу абалга келип калган.

Ачылыш аземине шаар мэри Жанарбек Акаев, тиешелүү мекеме-ишканалардын жетекчилери жана жергиликтүү тургундар катышты. Шаар башчысы анын бул аракетин айылга кызмат кылуунун мыкты үлгүсү катары даңазалап, шаардык инфраструктураны өнүктүрүүгө кошкон салымы үчүн мэриянын Ардак грамотасы менен сыйлап, ыраазычылыгын билдирди.