Кыргызстандын атактуу балбаны Акжол Махмудов Бишкек шаарында өтүп жаткан грек-рим күрөшү боюнча Азия чемпиондугунун финалына чыкты. Бул тууралуу Дене тарбия жана спорт мамлекеттик агенттигинен билдиришти.
Маалыматка ылайык, 77 килограмм салмак ченинде күч сынашкан спортчу мелдешти 1/8 финалдан баштап, жогорку деңгээлде күрөш көрсөттү. Ал Жапония, Казакстан жана Өзбекстандын балбандарын ишенимдүү жеңип, финалга жолдомо алды.
Алтын медаль үчүн финалдык беттеш 7-апрелде өтөт. Анда Махмудов Ирандын өкүлү Али Забихолла Оску менен беттешет.