Милиция кичинекей кызга ыдык көрсөттү делген жаран боюнча маалымат берди (видео)

Интернет желесине кичинекей кызга ыдык көрсөттү делген жарандын видеосу тарады. Бул тууралуу Бишкек шаарынын Биринчи Май райондук милициясынан маалымат берип, шектүү кармалганын билдирди.

Маалыматка ылайык, 7-апрелде милицияга М.А. аттуу жаран арыз менен кайрылды. Анда ошол эле күнү болжол менен саат 17:45 чамасында Тоголок Молдо көчөсүндө белгисиз жаран 2017-жылы туулган кызынын бетинен кармап, башынан сылаганын билдирип, тиешелүү чара көрүүнү суранган. Текшерүүнүн жүрүшүндө 1981-жылы туулган П.Ж. аттуу жаран кызга кол тийгизген учурда мас абалында болгону аныкталган.

Аталган факт боюнча шектүүгө карата Укук бузуулар кодексинин 126-беренеси (Майда бейбаштык) менен протокол түзүлүп, райондук соттун чечими менен 3 суткага камакка алынды.