Кара-Сууда заманбап медициналык борбор ачылды

Бүгүн, 12-апрелде президент Садыр Жапаров Оштун Кара-Суу райондук үй-бүлөлүк медицина борборунун жаңы имаратынын ачылыш аземине катышты. Бул тууралуу мамлекет башчынын администрациясы билдирди.

Маалыматка ылайык, имарат төрт кабаттан турат, анын ичинде жер төлөсү да бар. Мекеме заманбап медициналык жабдуулар жана эмеректер менен жабдылган.

Имаратта административдик кызматтар, консультациялык жана диагностикалык бөлүмдөр, ошондой эле медициналык изилдөөлөрдү жүргүзүүгө арналган адистештирилген кабинеттер жайгашкан. Борбор компьютердик томография, УДИ-сканерлер, рентген аппараттары, эхокардиография, ЭГДС, флюорография, фиброскан жана башка жогорку технологиялык жабдуулар менен жабдылган.

Автор: Кылымбек Бейшеев
Фото: Президенттин администрациясы